गझलची तोंड ओळख - भाग ११

📝 गझलची तोंड ओळख - भाग 11 📝
✒संकलन : डॉ. अमेय गोखले. ✒

💥आजचे गझल वृत्त :
          स्रग्विणी

🎶 एकूण मात्रा : 20

♻लगावली (लघु , गुरू क्रम)

गा ल गा गा ल गा गा ल गा गा ल गा
2  1  2   2  1  2  2  1  2  2  1 2
= 20

(गा - गुरू , ल -लघु)
💐💐💐💐💐💐💐💐💐

💥 आता उदाहरणे पाहू :

✒
सूर्य केव्हाच अंधारला यार हो
या नवा सूर्य आणू चला यार हो

हे नवे फक्त आले पहारेकरी
कैदखाना नवा कोठला यार हो ?

ते सुखासीन संताप गेले कुठे ?
हाय जा तो मुका बैसला यार हो

चालण्याची नको एवढी कौतुके
थांबणेही अघोरी कला यार हो

जे न बोलायचे , तेच मी बोलतो
मीच माणूस नाही भला यार हो

सोडली मी जरी , स्वप्नभूमी तरी
जीवनाची टळेना बला यार हो

हासण्याची मिळाली अनुज्ञा कधी ?
हुंदकाही नसे आपला यार हो

ओळखीचा निघे रोज मारेकरी
ओळखीचाच धोका मला यार हो

लोक रस्त्यावरी यावया लागले
दूर नाही अता फैसला यार हो
              (सुरेश भट)

✒
जे घडाया नको , तेच कैसे घडे ?
चालताना कसा , पाय माझा अडे ?

चेहरा कोणता ? मुखवटा कोणता ?
ओळखावे कसे , प्रश्न मोठा पडे

हुंदका दाबुनी , न्याय व्हावा कसा ?
ऐनवेळी असे , सत्य कोठे दडे ?

धर्म रंगांधळा , जातही पांगळी
का तरी पाडती , भावनांना तडे ?

घेउनी टाक हे , शब्द माझे तुला
अन्य काही नसे , दान माझ्याकडे
     (कवी डॉ. अमेय गोखले)

✒
जिंकलो मी तरी , हार झाली कशी ?
आतली ही फुले , ठार झाली कशी ?

धावलो धावलो , खेचले श्रेय मी
जिद्द माझी मला , भार झाली कशी ?

घोषणा भोवती , पूर यावा तशा
वेदनेने मुकी , तार झाली कशी ?

तारकांनी पुन्हा , साद नाही दिली
रात्र प्राणांवरी , स्वार झाली कशी ?

आतली पोकळी , गाजवी मालकी
तीच कंठावरी , वार झाली कशी ?
         (मंगेश पाडगावकर)

✒
जीव माझा मला , संकटासारखा
मी तरीही जगे , लोचटासारखा

काय शंका तुला , मी विचारू नये ?
मी म्हणे बोलतो , उद्धटासारखा

पत्थरासारखा , ऐकणारा मिळे
बोलणारा मिळे , पोपटासारखा

जे मला भेटले , ते असे भेटले
हा नटासारखा , तो कटासारखा

हेच माझे तुझे , एक नाते खरे
तू समुद्रापरी , मी तटासारखा

बोल काहीतरी , भेट झाल्यावरी
काय प्रारंभ हा , शेवटासारखा ?
             (सुरेश भट)

🙏🏻🙏🏻🙏🏻🙏🏻🙏🏻🙏🏻🙏🏻🙏🏻🙏🏻
✒ संकलन : डॉ. अमेय गोखले. ✒
💐💐💐💐💐💐💐💐💐